Ahós i completa 16 ano desdi ki djintis lanta cu arma na polon di Bra pa fugui contra terra, kuma pa firmanta djustiça ku J garandi. Ahos 16 ano ku passa terra sta suma ki sta. Dinguidu na mundu, sin rispitu nim darenti. El djustiça di J garandi kil sta nan guibadu.
Nka fia si djintis na tem coraj pa ruma djinti pa lembra és kussa medunhu ku homis fassi na és terra li. Kala Kaladu. Mukur Mukur ninguin ka ossa nan lembra é 07 de Junho de nudadi. Mindjor i fica sim dé.
Nô Kriol: Krónicas di Mussá Baldé
Kuma boca pudi ngana mundu, ma i cata ngana corson paki elis ku sta djuntu na curpo di si dunu. É pupanu ba kuma terra sta cansadu i pirsis filantal, ma é bim nhongolintil nan.
Guiné-Bissau: Guerra de 7 de Junho
I ka festa ma ali no tchamadu mas, anos djornalistas, pa bai um kumbelé kumbelé na Polas. Pursidenti di Kambança misti dispidi di djintis ki tarbadja ku el é tempu é manda falanu pa no bai tan. Talbez discursos na tem la.
Purmeru ministro de Timor-Leste, no padrasto, Xanana Gusmao bim Bssau. Kuma i bim djubinu na no mandintindadi si no na sta dja mindjor ou si no na cuntina koi-koi.
Kuma i bim tambi cumbida pursidenti ku purmeru ministro ku ledjidu pa é ba mati na runhon di CPLP na Julho na Dili, Timor-Leste. I na odja ku djintis ku ledjidu Dimingo Simoes Pereira ku Jomav, i na odja tan cu djintis di kambança, ku tropas, ku socedadi civil, ku djintis di Igrejas. Xanana Gusmao na nterga tanbi banco di dadu di recenseamento eleitoral a kin di diritu.
Otcha ki na ria na araporto de Bssau Xanana Gusmao na peradu ba na pista pa seeçon di futebol di no terra. Timor-Leste ku danu tacu pa no bai djuga na Congo contra Republica Centro Africana ku no kaba pa ganha li na Bssau pa 3-1.
Si alguin fassiu diritu su ka tene di pagal gardicil ku força.
Kuma pursidenti ku ledjidu na toma kuru dia 23 de Junho.
Palácio destruído pela guerra de 7 de Junho
Djintis di kambança fassi fassanha és dias ké pertu sai dé. É nterga 11 ambulancia pa djintis di tchon di Leste. Pirada, Madina de Boé, Fadjonkitô, Gabu, ku Bafatá. I ambulâncias cu Irão pati pursidenti di kambança, Serifo Nhamadjo. Kuma i 100 ambulancias, um hospital ku ta ianda (móvel), tris botes rápido pa pui na djius di tchon di Budjugus.
Kuma Banco Mundial dá terra 22 milhon di dólar pa kussa di luz ku iagu. 17 milhon i dinher ku terra pistadu, kil restu é patinu nan el. Ké pa Nhor Deus djudanu tan é mbes pa luz ku iagu tem na terra.
Utru nobu i di kuma campanha di kuku di kadju na bai diritu. Kin ku falam és i Jaimantino Co el i diretor geral de Comercio. Kuma té é quinta-fera ku passa sin i sta badja na alamcens na Bssau 40 mil tonelada di kuku pruntu pa mbarcadu pa India. Kuma prés di kadju sta bem é ano. 250 fran pa kilo, na utrus kau kuma prés sta dja na 270 fran. Kuma si kussas kontinua sin é ano no pudi bindi pa tchon di India 150 mil tonelada. Anu passadu no bindi indianos 131 mil toneladas.
João Bernardo Vieira durante a guerra de ’98
Ansumane Mané (esq.) e Veríssimo Seabra (dir.)
Djugu di Pé: Amido Baldé kuma i na djuga pa Guiné-Bssau na utru djugu contra Botsuana. Utrus djugaduris tan fala é pudi bim djuga pa Djurtus. Ké ma kil dia ku no suta Republica Centro Africana djintis contenti na Bssau. Pena kuma é bim fura comissário di djugu cabeça cu sintron. Tropas ohh, policias ohh, djornalistas ohh, claquerus ohhh tudu djintis contenti é mundu badju cada hora ku Guiné miti golo.
Ahos Bula na djuga contra Sporting. Si Bula nganha i na sedu pa purmeru bias campeon di Guiné na futebol. Djugu sta la dé, djugu na sedu na Bula. Fora dé djugu di ahos i sobra um djugu pa campeonato (cu dós nan yopot) caba.
Mantenhas desdi Bssau Nandô.
MB